Kan fale hna nih a hlan kan tein ABC an thiamnak ding ah bawmtu tha ngai a si. Santlailo cartoon video dangdang zoh ter nak cun mah bantuk thiamnak chaptu video pawl hi zoh ter i zuam hna usih tiah kan sawm hna. Laimi tampi hi Pathian zaangfahnak thawngin vawlei cung ram tha ah an fimthiamnak cawng kho ve ding le i ngeih ve ding in Pathian a kan thlah ko nain nu le pa daithlannak ruangah kan fa le cheukhat cu sianginn hmanh tha tein kai duh ti lo in warehouse le farm ah nilin lak ah pawcawmnak caah rian an tuan hna. Mah vialte hi nu le pa nih a herhning in lam hmuhsaknak a um lo caah a si. Cucaah ramdang ah fa le caah kan ra tiah nu le pa nih kan ti tawnmi hi hmur le kaa lawng siloin tuarserhnak in chim cang hna usih law a herhning in kan fa le hi fimthiamnak lei ah thazaang pek i zuam cang hna usih. Sianginn tha deuh zong ah chiah i kan thinlung i chia hna usih law hmailei i kan fale nih ramdang mi hna zong tei kho tu dirhmun ah an dir ve khawh nakhnga Pathian bochan in le zaanghlei cawinak he hmailei ah kal cang hna usih tiah duhpiaknak he kan in sawm hna.

Bia le hla ti a si bantuk hla nih taksa le thlarau thanchonak ah a lamkip in a kan bawmh ve. A bik in fa le hna thinlung ahhin hla nih cun hmunhma tampi a lak khawh caah ka fa le thlarau thannak ding ah bawmtu tha ngaimi hla an si. Hla hmang in a nungmi Pathian bia hi tampi in kan thinlung ah kan luhter khawh ahcun hmailei ah nunzia dawh in an thang lai i Bawipa mithmai a hngal ter tu le nu le pa lunglawmh ter tu an si lai. Cucaah Pathian hla hi tampi in ngaih ter le an thinlung i caam ter hi i zuam cio hna usih. Minung lei cawnpiak thiamnak nih fa le nun a thleng kho taktak lo. Fa le nun a thleng kho taktak tu cu Pathian bia  lawng a si. Cucaah kan fa le hi Biatak chung ah hla hmangin thanter hna usih.

Kan Bible nih Pathian a tihmi hna nih thluachuahnak an hmuhnak siseh, Pathian zei a rello mi hna nih chiatserhnak chung i an luhnak siseh fiang tein a kan cawnpiak. Bible tuanbia hi kan fa le caah lam hmuhsaktu tha ngaingai a si. Cucaah nu le pa nih kan Bible chung i Pathian a tihzahmi hna tuanbia thatha chimnak in siseh, video zohter nakin siseh kan fa le thinlung ah luhter le caam ter hi hmailei Bawipa duhning in an than khawh nak hnga a biapi ngaimi thil a si. Cucaah santlailo video dang zohter nak cun mah bantuk nun cawmtu Bible tuanbia hi zoh ter hna usih law thlarau lei ah kan fa le hi than ter hna usih.

Zumtu hna nih kan rian cu nifa kan nunnak i Pathian thangthat hi a si bantuk in kan fa le hna nih an kut le an ke in Pathian an thangthat khawh nak hnga tuahmi video a si. Kan fa le kha cawn ter cio hna usih law nitin an nunnak i Bawipa he an i pehtlaihnak ah bawmtu a si hrimhrim tiah zumhnak kan ngei. Bawipa nih thluahcuahnak in pe ko hna seh.